الأربعاء، 5 سبتمبر، 2012

أثناء البلل - جزء ثاني




كبر الواد وجاب شهادة الثانوية العامة والهدية المرة هادي سيارة...هوندا سيفيك أزرق بترولي عليها الكلام..(انقبعت بعدها باسبوع ماعلينا)..المهم جات المحروسة!
طبعا خفيف شمايل لو أمي تبغى منديل من الصالة أركب السيارة وأروح بيت ستي أجبلها منديل، على فكرة يا أمي ترا كيس الرز اللي حسبتي ميرسي الشغاله صرقتو مع بكتات المناديل وكيس الجراك حق أبويا.. أنا اللي خبيتو تحت الدَرَج ورا كرتون المكيف اللي عايشه فيه البِساس، عشان ترسلوني اشتري أي شي وتديني مفتاح المحروسة!

الهدية الأكبر كانت من أمي ..وافقت أسافر مصر مع خالتي إجازة الصيف..والليل الليل يابوتريك:)
رحت من هنا لابس بدلة من العيسائي طقم أمي جابتلي هيا فرحان بيها شكلي أهبل، أول ماوصلت هناك زبطني ولد خالتي على أساس إنو داشر في مصر ، تاني يوم خارجين ألاقي نفسي لابس قميص حرير مشجر مفتوح الأزارير و بنطلون كُسَر زي مصطفى قمر شكلي ،والجبهة وقتها شبرين بس لون عيوني تفرق، اوكي بالغت بصراحه مافكيت الأزارير بس الأزرارين اللي فوق كانت مقطوعه مشي حالك
نزلنا أنا وبندر ولد خالتي أقرب محل جمب البيت واشترينا دخان عشان نسوي الشباب الخربانين.
واقف برا البقالة جاني واد صايع أبو ٨ سنين يبيع سلاسل حقت رَوْشَنة قلت هوووبا هيا دي لزوم أُم الفلة, البنات أكيد يحبو الواد أبو سلسلة فرقبتو قلتلو بكام دي يا عم الأمور.. قعد يقلِّب في السلاسل الكتير اللي فيدو يمين شمال إلين طلّعلي من بطنها سلسلة على شكل ولد وبنت بيبوسو بعض وقال: بُص بُص يا باشا شايف إلِّةِ الأدب والوساخه؟؟ تاخد وحده؟ قلتلو امشي يواد هوا اللي بقي علينا؟؟ بكم دي قال بعشرة قنية يا بيه بس عشانك بِخمَاشَر ! قلتلو تخلِّص ٣ بعشرة قال حرام يابيه هوا احنا بنسرأ؟ حزنت عليه واخدت حبتين ليا ولبندر وبكده سرنا شباب خربانين تماماً. المهم اشترينا سندوتشات ورجعنا البيت نخطط لخرجة الليل والدشرة

وبدأت رحلة الضياع.. ملاهي السندباد.. فلوسك في جيبك وكل واحد معاه ٨٩ ورقة صغيرة مكتوب فيها رقم البيت عشان نغازل .. طبعا قعدنا أسبوعين كل يوم نرمي الورق في الزباله ونسوي ورق جديد نروح السندباد نلعب سيارات صدام ونرجع
بعدها قلت لبندر يبويا ترا مايسير نجي مصر وماندشر لازم خراب.. قلي قدام قلتلو والراجع قال مرا !!
تاني يوم اتشيكنا عالاخر وكل واحد لِبِس أطلق لبس( كداب هما طقمين كل يوم ابدل بينهم) وبدأت الدشرة... ملاهي السندباد برضو :)
المره دي لقينا في الملاهي. ديسكو !! ايوه مكتوب ديسكو السندباد وقفنا برا عند الباب الضمير والصحوة تلعب فينا لا حرام يا شيخ وانا اقله مانسوي شي بس نتفرج والكلب يقولي طب نولع سجارة عشان نتشجع ويحسبونا كبار ويدخلونا؟ قلتلو روق بلا سجارة بلا هبل سوي نفسك تشرب يعني يعني منتا فاكر كيف قعدنا نكحكح وانفضحنا قدام حارس العماره داك اليوم؟
المهم قطعنا احلى تزكرتين ودخلنا الديسكو ومن الباب وانا اهز واسوي عمرو دياب على بالي.. دخلت جوة لقيت ١٨٠ ولد و ٣ بنات ! مو بنات قدنا هما بصراحه كانو ٣ حريم داخلين ينتبهو على أولادهم غالبا
والبيست حق الرقص فااااضييي مافي إلا الولدين اللي كل يوم نشوفهم واقفين في الركن برا حق سيارات الصدام يتمرنو كراتيه وعلى بالهم بيرقصو !
جالسين نشجع بعض قوم ارقص يواد خليك رجال وانا اقلو من رقص نقص يا رِمّه ! اما اللي ارقص قدام رجال؟
شوية دخلت وحده بنت شَلَق شكلها يخوف وجلست جمبي عالمدرج حق الناس الي مسويين فيها يجلسو بعيد في الضلام ابتسمتلي.. قلت فقلبي عارف إني جذاب بس مو للصراصير ياهو حرام شبابي يضيع كده!
قالت اسمك ايه يا قميل لا شعورياً قلت سعيد العويران قالت معاك عشرة قنية قلت لا معايا خمسة بس.. قالت اديهالي عاوزة اشرب أزوزة .. اديتها خمسه
شوية وجات تاني قالت ماهر معاك عشرة قنية قلتلها اما ماهر؟؟اسمي تركي يا أمي! قالت طب معاك عشرة قلت لا خمسة بس, قالت طب عاوزة اقيب أزوزة لصحبتي شيرين هيا هتيقي دلوئتي وتبئا صحبتك قلت ومالو خدي خمسه، المهم بعد نص ساعه لقيتها لهطت مني ٨٠ قنيه رايحه جايه ولا شفنا شيرين ولا اتنين وعشرين ولا شي.
تركي معاك فلوس تكسي نرجع البيت؟ هاااا!!!!
اقلك يا مدموزيل معاكي عشره؟ امشي ياض لاخدك على بوزك !

كده شطبنا...يلا كل واحد على فصلو..وإلى هرجة جديدة قريبا

:ملاحظة: لايوجد أي علاقة من قريب أو من بعيد بين الصورة أعلاه وانتحار الاخوان عم جون وتوماس فوتوشوب:)

الأربعاء، 2 مايو، 2012

أثناء البلل - جزء أول




الآن ننتقل لفصل جديد من الهرجة...كنا شغالين في مراحل ماقبل البلل واللي كلها بزرنة وشقاوة ...الآن ندخل في مرحة الواد بدأ يكبر و يفكر ويشغل مُخو...طبعاً برضو حيشتغل المخ في الشقاوة مع شوية فنيات في الكدب ومحاولة خداع الأم والأب....والعيلة الكريمة كلها !!

في تشرين التاني من عام ألف و أربعمية وستة تقريبا ...*هههههه بدأ الكدب من أولها* المهم كنا عيلة طيبة وداشرة.. مو داشرة داشرة...بس يعني داشرة نص ونص...يعني بالعربي نروح في الأعياد الكباين (الشاليهات) وناخد الكيرم والضومنة مع شوية كُم كُم عشان ستي فتو ...

وعلى جمب طبلة وطار لزوم المواهب...يعني في اللي يدق عود واللي ماسك الطبلة واللي يغني ...واللي قاعد على راصهم كلهم يقلهم حرام...كل شي موجود في نفس العيلة...بس والله الكل مبسوط و مروق ...ومانعرف كلمة إخطلاط ولا ليبراليه...

*أظن لو أقول لأبويا ليبراليه..يحسبها سبة ويرزعني قلم على وشّي يجيب أجلي* .

المهم بدأت المواهب حقت الواد تظهر...خالي أحمد جايب علبة معدات وكيس عيش وعصاية خيزران كده شكلو عندو مصيبة !!

ألحق يا عم أدهم صبري وراه شوف إيش بيهبب...راح على البحر.. فرد السجادة ..وحط الراديو جمبو وفك العلبة وطلع السلاليك والشناكل حقت صيد السمك ...وجلس يعجن في أم العيش وفكلو علبة تونة و شي... قرف يحبو قلبك...وزبط الطعم .

مرت نص ساعة والرجال مدلدل الخيزرانه بالسلوك حقتها في الموية ولا حتى صاد فردة جزمة زي أفلام كرتون !! أما ايش قاعد يسوي خالي هنا ؟؟ ساعه ...اتنين والرجال جالس ومشغل لي عبدالحليم وريحة تونه مررره مايجي !!

رحت اشتكيتو لستي...قلتلها ستي فتو ترى خالي أحمد شال كيس العيش والتونه وقاعد يدلدلو في البحر.. قلك قلك يبغى يطلع سمك...وقاعد يسمع أغاني حقت الحُب ويرسم قلاليب بأُصباع رجلو في الأرض.. وعينو تدمع لمن يصرخ عبدالحليم حبّااار .. حبّااار.. قالت : ايوه عاد محلاه خالك عاشق ومفارق الأخ..روح ازهمو قلو تقلك ستي لو ما تسيبك المجنانة حقتك دي مايسير طيب ...

خفيف ظريف رحت أجري قلتلو خالي أحمد تقلك ستو فتو لو ماتبطلك المجنانة وقلة الأدب والفجر اللي انته فيه وتعاكس بنات الناس إنته وصاحبك ... اخص عليك اخص ياللي ماتستحي...قوم سيب كل شي وانزل جده جبلنا عشا دحين !!

انخرط خالي وقتها ... وستي خشت تريح شوية عشان مدروخة صاقعتلها راصين باعشن جايبتها الأرض.

وراح كلم أمي وخالاتي واتفقو ينزل يجيب بخاري ودجاج شواية ..*شوفو المزاج الدايخ..في الكباين ويأكلونا بخاري * ...بس هوا شغل السيارة من هنا...وأنا جري على العلبة حقتو !!

ونفس الجلسة يا معلم وعلى نفس الراديو وعايش الجو إني أصيد سحلفة ...مافي ..طب أبو جلنبو؟...مافي ..وطول الليل وأنا اتناحل مع السلاليك حقت الصيد إلين ما جبت أجلها كلها أتلعبكت ونكبت الدنيا.

طبقت العلبة ورجعت كل شي وسيبتها وخشيت نمت ولا كأنو في شي....!!

تاني يوم عالمغربية لقيت شوية فلابنة مصايب قاعدين يصيدو على الشط...وصادو سمك كتير وشي طررررب ...كان معاهم سمك كبير بيستخدموه عشان يصيدو سمك أكبر وجايبين تلاته أكياس مليااااااااااانه سمك ...اتفقت مع واحد منهم هلو يا مستر.. كموصطفا لوتفي المنبلوووطي كموسطفاا..ايوااا ..المهم قلي بالفلبيني انو حيديني الزياده..يعني أبو كيسين سمك !!

أجري عالكبينه وسوي إعلان الليلة حعشيكم سمك يا ناس...ولا تشترو عشا ولا أي شي..!!

ماجات تسعه في الليل إلا وابوتريك داخل الكبينه ومعاه كيسين مليانه سمك سلماني والحريم تزغرط وخالي أحمد مقهور لأنه ماصاد وانا جايب الديب من ديلو...وستي فتو تعطيه على راصو ...شوف العص ولد أختك جايب الحوته وانته يا خايب ماعرفت تجيب فصين توم !!

مابغى أخوض في تفاصيل كتير بعد كده...بس اللي افتكرو ...انو كنا اول عيله تسوي غسيل معدة جماعي بربطة المعلم.. في مستشفى خالد ادريس اياميها !!

الين هنا ونوقف يا جماعة عشان سببين : أولها لا نخسر بعض...وتانيها ...لأني لو كملت حجيب العيد أكتر واحتمال ألقى العيلة عاملة اجتماع طارئ عشان يتبرو مني:)



*إذا عجبتك الهرجة...سبردها للعالم...وإذا ماعجبتك صفني زي الجنط ماعليك*



الخميس، 22 مارس، 2012

ماقبل البلل - جزء سادس





يوووه..الطفش مرره زاد أنزل لستي فتو ألقاها بتدعبس في راص خالتي الصغيرة مدري إيش تدوّر...بعدين عرفت إنو تدور على حشرات منزلية أليفة اسمها سيبان ! 

أطلع فوق ألاقي أبويا قاعد يلمع الشربوش حق الشيشة و يلبِّس اللّي البيت الإتحادي الجديد عشان العيد قرب...


حلو..ولعت اللمبة فوق راصي!...أروح أزهم على ولد عمي يا رااامي رااامي ...أنزُل أنزُل وسُك الباب حق سيدي لاينتبهلك.

نزل رامي وفقعنا على الدُكان حق عم مرزوق الشيبة اللكيع...جالس عم مرزوق معاه تلاته أصحابو قُدام الدكان وقدامهم براد الشاهي المِسبّك, سلامُ عليكم عم مرزوق تقلّك ستي تبغى أكياس نايلون صغيرة وقارورة فينتو وسجلها في الدفتر.

رامي يطل فيا ..إيش عندك مصيبة يا أفندي؟ *أنكتم خلينا ناخد الأكياس بعدين أفهمك لاتقعد تلبلِب زي البنات تفضحنا!!*..عم مرزوق ناولني الأكياس والفينتو وسحبنا خفيف خفيف عالبيت.


اسمع يابو الروم..أنا حاطلع السطوح وإنته بعد دقيقتين تطلع ورايا وتجيب معاك لَيْ الموية اللي في الحوش..وأصحك ينتبهلك سيدي محمد وربي نتشبشب اليوم !!

طب ماحتقولي إيش حنسوي ؟ ليه لَي الموية والأكياس تبانا نبيع عصير توت في الحارة ؟ ..نبيع مين ياقمر الدين ؟ اهاا إيوه إيوه حنبيع عصير توت وجوافه كمان..إنته بس سوي اللي قلتلك عليه.. بلافشكلك حتجبلي القرينة هادا إيه دا ؟

طلعنا السطوح وجبنا سطل وعبيناه موية وكبيت الفينتو في السطل أحمر دم يامعلم!!..يلا يابو الروم أنا أعبي في الأكياس وإنته تربط , نُص ساعة وقيدنا مزبطين أبو خمسين كيس فيمتو يحبها قلبك ورامي عيونو تلقلِق على بالو حننزل نبيع الكيس بنص ريال ونجيب فلوس هأأوو...

تعال ساعدني نرفع السُلَّم ونِركِزو على جدار السطوح من ورا...*ليه كمانا إيش عندك ياخوفي تكون ناوي على مصيبة؟؟*


 لالا ياشيخ تعال أنا حافهمك الهرجة...شايف الحوش اللي ورانا حق البنقالة ؟ياخي دول مساكين وماعندهم عصير وأنا ناوي اليوم... أروشهم..قصدي أساعدهم وأديهم عصير يفرحو وينبسطو *ابتسامة كلبنة قصوى*.

أطلع يابوتريك فوق السلم وهاتك يا رمي أكياس على الشارع والحوش حق البنقالة..وشوية وتسمع صوت صريخ و زعيق..


ورامي الطلي يسأل: *طب ليه بيزعقوا؟ طب ليه تِندَس وتنزِّل راصك بسرعه ؟*اهجد يا أهبل لاتفضحنا!! في أحد يعمل خير ويقول للناس شوفوني؟؟أسمع بقي خمسة أكياس اطلع إنته ارميها وأنا حانزل تحت بيتنا أغسل يدي وأطلعلك نشوف إيش صار معاك...اسمع لازم تقنّص كويس لمن ترمي وانتبه لاتجي في أحد ...أرميها على الملابس المنشورة.. عالحبل عادي يصقع فيها ويطيح الكيس وهما يشيلوه.

وأجي نازل في الدُرجان زي الطيارة على تحت وإلا في وجهي سيدي محمد بالبصطون واقف وطالع من عيونو أشعة ليزر تعال يابن الكلب اشبك تجري؟ ها..؟! أنا؟.. لا يا سيدو أنا بس كنت أبغى أقلك على سر بس خايف تضربني...أنطق قول لا ألهَدَك بقفا يدي أجيب أجلك إيش عندك؟

والله يا سيدو هادا رامي الله يهديه..طلعت السطوح لقيتو بيرمي أكياس حمرا على الجيران في الحوش اللي جمبنا...وزعقت عليه وخاصمتو يا رامي ترى كده غلط ومدري إيه ومدري إيه ..قلي قول فلاح قلت فلاح قلي مالك صلاح..ونزلت وانا أجري أبغى أقولك عشان أنا مايعجبني الحركات دي.

طلع سيدي محمد السطوح بالبسطون والليزر شغال...ومن يومها إلى الآن ورامي يفتكر ويقول...منك لله يا قزم إبليس!


لاتستنو نهاية للقصة ياجماعة..زي كل مرة ...تررركي ! خش الغرفة وأرفع رجولك واستناني يابن الــ...:)




*لايومها مارمينا بيض على أحد...لكن عموما البيض حكايتو حكاية تانية*

*القصة تسعين في المية منها كدب..لاتورطوني مع ولد عمي*

*سبرد لاتسبرد*



السبت، 10 مارس، 2012

ماقبل البلل - جزء خامس


أسمع يواد ..حُط الكلام دا زي الخُرص في إدنك ...ترى وقت الخُطبة في صلاة الجمعة لو اتكلمت كلمة راحت عليك الصلاة..فاهم؟ طيب حاضر يا أمي ماراح أتكلم ..أوعدِك.



في شي بيطزطز في ضهري إيش دا ؟ طب أدير وشّي أطُل ولا حتِخرب الصلاة؟أُف الطزطزة رجعت تاني !...وأدير وشّي وألقى واد قدي ماسِك مدري إيش وبيدُقني في ضهري من ورايا..أشرتلو سُكيتي روق..!


قرب مني إلين ريحة نسمو المعفِنة عمتني..وقال: صُك فمك لا....أمك !أُف أُف ماخدناها دي السبة في المدرسة ولا عمرها ستي فتو قالتها ؟؟ بس شكلها مره عيب ..*إشبك يابوتريك دا بيسُب أمك !!أمك..أمك...أمك* أُووبا ...ونقحَت حِتة الكرامة وقتها !!

قلتلو نخلِص الصلاة ونتفاهم برا..وقدّمت عنو شوية...رفزني بِرجلو بقوة وقال: والله لا أكرُسك !!
أنا فبالي وقتها المجنون أبو ريحة حيضرُبني بكرسي وسرت شايل هم طول وقت الخطبة ولا أدري الإمام إيش بيقول..

خلصَت الصلاة وطلِعت برا عند الباب أدوِّر عالشبشب لايكون أنصرق زي كل أسبوع ...ما شُفت الواد وسرت مِغتر بنفسي أقول شكلو خاف مني الطلي..*على بالي زي ولد عمي أفقِّع وشّو كل يوم ويشرد* ..وما ألاقيلك إلا شبشب ماشي ألف في الهوا يصقع في راصي دررربج !!*وعصافير*


أدير وشّي من هنا وألقا إبن اللّزينا رمى عليا شبشبي وجا في طرف غُرتي وخِربت قصّة الأسد!!..*واللــيل اللــيل*...الوعد اللي وعدتو لأمي... راح و القَصّة اتلخبطت والچِل ...ساح!
قلب أبوتريك سوبر فلاي سنوكا  ونط عالواد وهاتك يا فرش ..مِجنانه زي العراري وأبكاس وركب وقراميع شاكوش ورى بعض وتوبي اتشقشق الجيب وحااالة ...

على طول العالم قامو يفارعوا و وخرونا عن بعض وهوا يسب كلام عيب وأنا أقلو يا كلب يا حمار يانخلة الحيوان *والله ماقلت كلام من النُص التحتاني عشان عيب*.

فارعوا الناس ورحت أدور على الفردة التانية  ولمن لقيتها نقحَت عليا الكرامة تاني!! *أفتكرت الشبشب لمن خربلي قصّة الأسد* !!

ويااااااااا ليحي ... وياااااااااا ليحي على الشبشب اللي انطبع على الخد اليمين من وشّو!!!
بكل ما أداني ربي من قوة نطيت ونزلت على وشّو بالشبشب...خطافيه من أبو دموووع!
وأرفع يدي أبغى ألقُمو بالتانية ..إلا ويد تمسكني بقوة مررة ...زي الأفلام...بس الفرق إنو اللي كان ماسكني أبو الواد !! 


سيييب سييييب والله ما أسيبو وربي لا أفقِّع وشّو..قال أصبر أجبلك الشَرطة يا قليل الأدب...خَش هنا صوت هادي..خير يابويا سيب الولد إيش في؟ جات الحمية يا عيال :) عمي قدوري و وراه إتنين من خيلاني..أحلى عليكم محاتفقَّع لحالي ! .

تحقيق سريع أبو خمسة دقايق إيش سار ما سار وعِرِف أبو الواد الهرجة وإنو ولدو غلطان وسحبو من ياقة التوب ومشي...!


رحت البيت مع عمي قدوري وأبويا عِرِف إنو تركي أضارب!!..شوية دخلت عند أمي...

هوووبا ... الناس في الناس وأم تركي تقُلك إنته قليل تربية... بدل ماتقوله الله يسامحك ضيعت جُمعتك وراحت صلاتك ..وأعطتني دُش يحُبو قلبك !!



زهمني الشنب بعدها.*والليل*.الشنب مايتفاهم شكلي حاتفقِع علقة اليوم...قال تعال يواد..حكيني إيش سار بالتفصيل؟..فرطتلو السبحة *ماعدا الكلمة العيب..عشان عيب*

سكت أبو نُص دقيقة ..وأنا يقُلي عقلي حيقوم يجيب الخيزرانه ولا حيمشيها كفكفه بس؟

قال: أهم شي كروَتّو ؟ *كيف؟ ها ؟ مين دا ؟*...قال زي منتا سامع كرْوَتْ الواد ؟ أخدت حقك ؟ قلتلو إيوه وطبعت أُم الشبـ..أنكتِم!*بحزم*

بعدين قال : حُط في بالك ياولدي ...ترى كل قوي وفي اللي أقوى منو ...ولو فقشت الولد لاسمح الله ولا سارلو شي الشَرطة تسجنك ..انتبه..وأصحك تفتري عالضعيف!



بقية اليوم سرت محمد حمزة في زمانو !! أعدّي من قُدّام أبويا كاشخ شوية وارقص مزمار من الفخر...أخُش على المطبخ عند أمي أسوي متبكبك وحزين..ولليوم حزين على كلمة ضيعت أجر الجمعة!





دق الجرس..يلا كل واحد على فصلو...واللي ما ناسبو الچل قلو عن سمايا حل!




*إذا عجبتك الهرجة...سبردها للعالم...وإذا ماعجبتك صفني زي الجنط ماعليك*


الخميس، 23 فبراير، 2012

ماقبل البلل - جزء رابع


كبر الواد ... وسار رجال...طبعاً كبر وسار رجال يعني خش  المدرسة لايروح بالكم بعيد ...



أيامها كان البرنامج اليومي مدرسة بيت تحفيظ مزاكرة لعب ونوم والتمشية كانت المداريه...(المراجيح) وسمع الله لمن حمده.

المدرسة ..أكتر شي افتكرو فيها غرم الله مدرس الراضيّات ! فرشني بالعصايا عشان غلطت غلطة وحده في جدول الضرب...كرهتو وكنت أنتقم منو في خيالي ...وكنت أتمنى الواد الجعرومي أحمد علي الملقب بأحمد قحص يمسكو يفرشو لأني كنت احسبو أقوى واحد في الحياة وأخاف منو الخدمي اللي يحط جراك أسود في فمو كل يوم.

التحفيظ ...أروح المسجد نحفظ كل يوم سورة وأرجع البيت أسمِّعها لأمي صَمْ وأحكيها عن ولد المختار اللي مو حافظ ولا ولد عبدربه اللي يجي حافظ يقهرني مزاكر من قبلنا!!..

اللي لفت نظري ليه الإمام عندو دويره سوده في راصو؟؟



سألت أمي كيف الدويره دي؟ قالت دي من الصلاة إسمها سجدة..تطلع للناس اللي يصلو كتير ويحبو الصلاة وتكون دليل على إنو دا البني ادم كويس وربنا يحبو...


طبعاً أبو العريف سار يفكر كيف يخلي ربنا يحبو في تلاته أيام بالكتير!! أيوة في تلاتة أيام...

سرت من قبل لا يأذن العصر وأنا مسنتر في المسجد وهاتك يا صلاة صلاة صلاة..وحكحك لا تحكحك ...اسجد واحك جبيني بقوة...وفعلاً في تلاتة أيام صار عندي جرح ..هبالة جرحت جبيني من الحكحكة ورحت فرحان لستي فتو الغلبانة أقلها شوفي ربنا يحبني وفرحت بيا مرره...ولدنا عمرو 9 سنين وعندو سجدة !

ماكِملَت الفرحة وفضحت أمي الهرجة قدام ستي وخالاتي وخلوني مصخرة...وبدأت رحلة مسح السجدة..شوية واحط قطن عشان جبيني لايحك في الأرض وأنا أصلي.

من زرع حصد ولهط أحمد التفاحة..وهند الهبلة زهبت للحديقة..مع إنو وربي ماعندنا حدائق..المهم يلا زاكر وشد حيلك عشان تسير دكـ تور..أحا كل عيال العيلة دكاتره أومال مين اللي حيمرض؟

الناجح نجبلو هدية...وجات الهدية الأليمة...بدلة سوبرمان ...وياسيدي على الحياة سبعة أيام أكد شعري عالجمب  والبدلة ملبوسة تحت التوب وتحت الشورت وتحت أي شي والريحة مقطًّنه المهم ماتتفصخ عشان أنا سوبرمان اللي حينقذ العالم.


تاني يوم خالتي تكفشني بعدما فقشت ولدها وفقّعت وشّو وأنا مسبرِن بالبدلة وبأنط من بلكونة الدور التالت يا معلم...أبغى أطير !.. يومها أتعرفت على أحد أسلحة خالتي قرنديزر الشبشب الطائر! وشالت أمي البدلة رمتها في الزبالة قدامي!!


هنا قررت إني أنتقم من خالتي وأوريها ليش ماتخليني أطير؟؟

أبويا كان جايبلي علبة أدوات تنكر..وفيها شعر أبيض زي الدقن..ركِّب الشعر يا بو الشباب وامسك توب قطِّعو ومردِغ أبوه في التراب وفوقو شماخ قديم وروح لخالتك دق الباب سوي شحات أبكم!..وفعلاً تلاتة ريال زي اللوز أول مرة ...وتاني وتالت..والله لا أشتري بدلة سوبرمان على حسابِك...

وجاااك الموت يا مليح !.. مافي كم يوم وأنا عند باب بيت خالتي كفشني أبويا...ولا أحكيكم على العلقة المحترمة اللي أكلتها...عرفت يومها إنو أبويا سوبر فلاي سنوكا متنكر وضاحك علينا ومسوي إنو من كوكب الأرض..كل شي عندي كان شخصيات فضائية وخيالية..جوة عقلي العبيط فقط!

أوف ! دق الجرس..يلا كل واحد على فصلو...واللي مو عاجبو...ينتف...لالا..يقابلني في الصرفة أنا ...وأحمد قحص!






*إذا عجبتك الهرجة...سبردها للعالم...وإذا ماعجبتك صفني زي الجنط ماعليك*

الخميس، 2 فبراير، 2012

ماقبل البلل - جزء ثالث


أكدب علييييك ..آآآآ...أكدب علييييك آآآ.. أكدب عليك لو أولت بحبااااااااك لسسسا أكدب عليك تيرا رارا..

( أخش أخربها) أوماااااااااال أناااا إيش قلي انته أناااا إيشششش؟ لالا تاااكل عيييششش..

كانت دي أغنية وردة الجزائرية ...شغالة في البيت على طووول وأمي لابسة التوب حق البيت ورابطة راصها بداك المنديل حق سعاد حسني..وأخوكم في الله شورت بنطلون توب أي شي بس المهم منديل رابط راصي زيها ومتشعبط أنضِّف معاها المكتبة الكبيرة ..اللي غالباً كل العيلة والجيران عرفوا إنها بسبعة آلاف ريال من أمي وخالاتي وهيا مايوصل سعرها ألف ريال..بس عاد البهارات.

جلسة العصرية حقت أمي وخالاتي كانت الفقرة اليومية ...الرجال في الشغل والحريم كروبو وشاهي وهروج ماتخلص..وكل وحدة أول الجلسة تمدح في بزورتها بعدين تطلع أم الفضايح وحدة وحدة وهاتق يا هشتقه فينا...وبعدين تقلك الطير الأخضر قال لي !!

وكانت في وحده غلبانة اسمها إنشراح تجي تسويلهم حنة وترمي إدنها مع الهروج اللي تنقال وتنقل الهروج لوك لوك لوك من بيت لبيت ...بعدها عرفت إنها سافرت بلاد برا واجوَّزت واحد خواجة وجابو ولد أبيضاني من أبو نمش في وشّو..سموه جاك الدُرزي ..وغالباً هوا اللي لقط هرجة الطير الأخضر وغير لونو ابن اللذينا وخلاه أزرق وعمل تويتر!!


طبعاً مايحتاج أعترف إنو نص الأسلحة المحرمة دولياً كانت موجودة تحت السرير عشان الطير الأخضر دا لازم يموت...سكينة ملطوشة من الطيارة ..ونوبيلة معمولة بلسَاتِك معفنة..ونينشاكو حقت بروسلي سارقها من ولد عمي ...
أكبر مني وكان على بالو إنو حيسير في يوم من الأيام جاوي من كتر مايلبس بلوزة بيضا مقطوعة من الرقبة وبنطلون أسود حق السوريين وجزمة البنات حقت الباليه !! وكل ألعاب المضاربات كان هوا بروسلي واحنا الأشرار...وبرضو ينفرش.


بعدها نِتْرَص كلنا البزورة بنات على أولاد قدام التلفِزون ولا حرف متحمسين عشان العرض حق الاستاند أب كوميدي..عم مشقاص ..العِمّة والشنب والحكاوي اللي تضحكنا..لا في غمزة ولا اعتزار ولا قابلني تسعة إلا ربع..كلو ينام بدري!


بعد العصرية تسمع الصوت اللي يزعق فررررقناا..فررررقنااا...حماااس هذا رد سي مول بكبره جا تحت البيت ..جا عم فرقنا بالبقشة حقتو يبيع القماش وتياب الحريم..وعاد شوف اللي تكشخ هيا اللي جوزها يشتريلها قطعتين أكتر من أخواتها ويقعدو يفرحو بيها سنة على الأقل!...وتاني يوم يروحوا بالقماش عند بنات حنيفة (بنات حنيفة خياطات باكستانيات زمان كانو ساكنين في بيت شعبي). 


بعد المغربية تنزل الشيشة تحت عالدكة ...ويتكي أبويا وكم واحد من عماني وخيلاني وهاتك يا هروج ..يهرجو على السفر والبيت الجديد والأرض أبو إطنعشر ألف ريال ..وعمي أحمد كان مسوي عصام الزامل حقهم أسمعو كلامي اشترو في الشمال قبل لا ترتفع الأسعار...ولا أحد يعبرو..وهوا أول واحد بنى الفيلا والبقية راحو جلا!




كده خلصنا...يلا كل واحد على فصلو ..وإلى هرجة جديدة قريبا.






*إن عجبتك الهرجة أنشرها وسويلنا فولو يا حلو.. وإن ماعجبتك أنشرها وأدي فرصة لغيرك بلكن تعجبو...:)*










الخميس، 26 يناير، 2012

ماقبل البلل - جزء ثاني


نفس الولد..اللي انولد..في نفس البلد...بدأ يكبر ويتفرج تلفزون ..ويحط في فمه البرجون..يبغى يعرف ليه أبوه يقول غلط يامجنون؟


أيامها موظف الطيارة كاش...وكل إجازة من دولة لدولة ببلاش..

رحنا ألمانيا وأول مصيبة الولد جالس على كنبة في بهو فندق..إسمو مدري ايش ماينحفظ سوبرماريوت أظن..وفجأة الكنبة اللي جالس عليها طارت لفوق نص متر!!

يا سااااتر!! خير يبويا ؟؟ الواد جالس في أمان الله..طلعت الكنبة ببساطة كلب كبير زي حق هايدي, كان نايم ابن الـ..كلب..

بدأت البرابير تسيل في الموقع وهاتو الدفاع المدني تركي جالس فوق الكلب شاخخ على نفسو ويبكي..فضحنا وسارت سيرتنا بالألماني على كل لسان..وصار الانسحاب طيب!

أخدنا طيارة خاصة..(أيوه خطوط أبويا) ومن ألمانيا إلى لندن.. بلد ساعة بق بن اللي تطنطن...بلد تاتشر والعيال.

بس نركب التكسي أبويا يقول سيسيكس قاردن ..وانا أنط بلقافة ...ون ناين فايف..ون ناين فايف...(هذا العنوان محل ماكنا نازلين)..(وأمي مستلمتني فكس وفازلين).

عاد في لندن كنت الواد العربي المشهور...بس مشهور بإيش؟ بكل فخر بالشقاوة..

ندخل محل أمسك الحلاوه أفكها وأدوق..هممم موطعمة!...ترجع عالرف لامن شاف ولا من دري... وإن عجبتني ألهط الباقي واروح لأمي بالورقة عشان انصحها تشتري منها ..طعمة يا ماما (بكل فداغه) ...ويجيك الكف الطياري ولا القرصة في فخضك اللي تخليك ترقص بريك دانس مكانك.

مع الشقاوة هناك ,عشرطاشر مرة كنت حاندعس في الشارع...أجري ورى الحمام اللي في الأرض...أكلم العالم بالعربي ولمن يردوا انقليزي زي الكفار أزعل واصنقر ..والكفوف بتزيد والراجل يدو بدأت توجعو فما لقي حل إلا...سلسلة الكلاب!!!

تمشي في الهايد بارك في لندن تلاقي مستر جون ومرتو مزمزيل جاكلين ساحبين كلبهم شحيبر يفسحوه وبنفس زات الوقت تلقى الشنب ماشي جمبو مراتو و ساحب في سلسلة الكلاب محسوبكم شـحـ..ـتركي.

طبعا ماكملت السلسلة يومين ..إلا وألحقو جيبو المطافي, بألعب بالسلسلة شد الحبل وأخلع دراعي بوسط شارع اكسفورد حق المونوبولي...ودور وقتها على مستشفيات الواد خلع دراعو وجبلنا جريه...بعدين عرفت انو الموضوع اتحل في جدة عند واحد طبيب شعبي اسمو الريفي...




كده خلصنا...يلا كل واحد على فصلو ..وإلى هرجة جديدة قريبا.



هرجة زغيرة : *كفوف أبوك من خوفه عليك هي أجمل ماقد يقع على خدك*

هرجة متينة : *العدد الجاي يظهر بروسلي*